Ram Charan : మెగా కుటుంబంలో సంబ‌ర వాతావ‌ర‌ణం నెల‌కొంది. అందుకు కార‌ణ‌మేంటో ప్ర‌త్యేకంగా చెప్పన‌క‌ర్లేదు. మెగాస్టార్ చిరంజీవి త‌న‌యుడు, హీరో మెగా ప‌వ‌ర్‌స్టార్ రామ్ చరణ్, ఉపాసన దంప‌తులు త‌ల్లిదండ్రుల‌య్యారు. సోమ‌వారం రాత్రే అపోలో హాస్పిట‌ల్‌లో జాయిన్ అయిన ఉపాసన.. మంగ‌ళ‌వారం తెల్ల‌వారు జామున ఆడ‌బిడ్డ‌కు జ‌న్మ‌నిచ్చారు. తల్లీ బిడ్డ ఆరోగ్యంగా ఉన్నారు. రీసెంట్‌గానే రామ్‌చ‌ర‌ణ్‌, ఉపాసన తమ 11వ పెళ్లిరోజును సెల‌బ్రేట్ చేసుకున్నారు. ఇప్పుడు మరో శుభ‌వార్త‌ను తెలియ‌జేశారు. వీరికి 2012లో వివాహం అయ్యింది. పాప పుట్టిన సంగ‌తి తెలియ‌గానే కుటుంబ స‌భ్యుల‌తో పాటు అభిమానులు సంతోషంగా ఉన్నారు.
భర్త రామ్ చరణ్‌తో పాటు తల్లి శోభన కామినేని, అత్తమ్మ సురేఖ కొణిదెలతో కలిసి సోమ‌వారం సాయంత్రం అపోలో ప్రో హెల్త్ హాస్పిటల్‌‌కు ఉపాసన వెళ్లారు. ఆ వీడియో నెట్టింట వైర‌ల్ అయ్యింది. డిసెంబ‌ర్‌లో రామ్ చరణ్, ఉపాసన కలిసి తాము పేరెంట్స్ కాబోతున్నామంటూ అధికారికంగా చేసిన ప్ర‌క‌ట‌నతో మెగా అభిమానులు సంబరాలు చేసుకున్నారు. ఆ మధ్య ఓ సంద‌ర్భంలో చిరంజీవి మాట్లాడుతూ జూలైలో చరణ్, ఉపాస‌నల‌కు బిడ్డ పుట్టే అవ‌కాశం ఉంద‌ని తెలిపారు. అయితే ఇంకా ముందుగానే వారింట సంబ‌ర వాతావ‌ర‌ణం నెల‌కొంది.
మరో వైపు హీరో రామ్ చరణ్ సైతం సినిమా షూటింగ్స్ నుంచి బ్రేక్ తీసుకుని మ‌రీ తన స‌మ‌యాన్నంతా ఉపాస‌నకే కేటాయిస్తూ వ‌స్తున్నారు. . ఆయ‌న ద‌ర్శ‌కుడు శంక‌ర్‌తో కలిసి గేమ్ చేంజ‌ర్ అనే భారీ సినిమా చేస్తున్న సంగ‌తి తెలిసింది. జూలై నెల‌లో శంక‌ర్ మూవీకి సంబంధించిన షెడ్యూల్ ప్లాన్ చేసుకున్నారు. అయితే ఇప్పుడు రామ్ చరణ్ రిక్వెస్ట్ మేర‌కు షెడ్యూల్‌ను ఆగ‌స్ట్‌కి మార్చారు. అందుకు కార‌ణం ఉపాస‌న‌కు డెలివ‌రీ అయిన కొన్ని రోజుల వ‌ర‌కు రామ్ చరణ్ ఫ్యామిలీతోనే తన స‌మ‌యం గ‌డ‌పాల‌ని నిర్ణ‌యించుకోవ‌ట‌మే అందుకు కార‌ణ‌మ‌ని వార్తలు వైర‌ల్ అవుతున్నాయి. ఈ భారీ బడ్జెట్ పాన్ ఇండియా మూవీ వచ్చే ఏడాదిలో రిలీజ్ అవుతుంది.
